19febrúar

To Hell and back..

Nú er ég kominn aftur heim eftir vel heppnaða ferð á háskaslóðir stórborgarinnar. Þetta var hryllilega gaman og gríðargott og hollt að hitta svona mikið af afskaplega fallegu fólki sem maður elskar svona afskaplega mikið.
Ljótu Hálfvitarnir voru stórfenglegir og skinu þó skærar á Laugardagskvöldinu. Þó var fyrra kvöldið hryllilega skemmtilegt líka. Gaman að sjá svona menn eins og Kristján Þór blása í herlúðra eftir langt hlé. Og svo náttúrulega Ibo maður!! Hryllilega fyndið..
Er kominn með nýjan uppáhaldsdisk. Það er "In the absence of truth" með Progg/Black/Death metal bandinu Isis. Furðu hæg, falleg, þung, dapurleg og kraftmikil plata. Og líka kjörin til að keyra á 90 kmh.
Svo fann ég upp nýja apategund á leiðinni heim í gær. Það eru svokallaðir sokkapar! Þetta fannst mér alveg hryllilega fyndið, keyrandi skítþunnur og þreyttur..

bless og skrifiði nú eitthvað fallegt, hnossin mín litlu..

19. febrúar 2007 klukkan 19:12
Jóhann Hermannsson
6 athugasemdir

15febrúar

Júhú!!

Núna getur Hilli litli loksins hætt að væla því að ég kem brunandi brjálaður í borgina á morgun til að þurrka tárin af votum hvörmum ljúfsins litla.
Tilgangur ferðarinnar er óljós með afbrigðum en býst ég við að þurfa að sitja einn, jafnvel tvo tónleika með ljótu hálfvitunum. En eins og allir vita er það næstum ógjörningur án þess að hafa öl við hönd. Þannig að öl verður það, heillin. Svo verður náttúrulega farið í skylduheimsóknir á Vitabar, geisladiskabúð Valda og fleiri staði.. Hugsanlega rekst maður á einhvern sem maður þekkir en best væri þó að sleppa alfarið við það. Hugsa að ég gerist köttur í bóli séra Bjarnar hjá Gums og Tiinu en sófinn þar hefur reynst mér góður griðastaður við fleiri en eitt tækifæri.
Hugsanlega tek ég með mér laumufarþega eða tvo.. En eins og staðan er núna er allt óljóst með það enn.

En allavega. Sjáumst á Rosen á morgun

P.S. ég er ekki veikur ennþá.. vorkunn off

15. febrúar 2007 klukkan 16:07
Jóhann Hermannsson
Almennt
4 athugasemdir

13febrúar

...

Setti inn tengil á Ljótu Hálfvitana undir tónlist. Ég ætla nú ekki að ganga svo langt að segja að þetta séu ljótustu hálfvitar á Íslandi en þetta eru tvímælalaust hálfvitalegustu ljótu menn á landinu..

P.S. Ég er veikur.. vorkennið mér..

13. febrúar 2007 klukkan 21:34
Jóhann Hermannsson
Almennt
7 athugasemdir

07febrúar

Tuðstuð

Djöfull andskoti fer nýja fréttastefið á rúvinu hryllilega í taugarnar á mér! Algjörlega ómarkvisst, illa samið og ólíklegt til að vekja áhuga nokkurs manns á komandi hörmungarfréttum um hækkandi hitastig jarðar, stríð í Súdan og Færeyjum og nýjasta millilakaafreki Paris Hilton og Britney Spears.
Fyrir það fyrsta áttu þeir ekkert að breyta þessu. Gamla stefið (þótt komið væri á virðulegan aldur) var svo sannarlega ekki búið að syngja sitt síðasta. Það hafði einhvern virðulegan blæ og mjög settlega sagði manni það að Broddi Brodda væri í nánd. Nýja stefið er eins og biluð dyrabjalla! Og fyrst þeir endilega "þurftu" nýtt stef þá hefðu þeir átt að hafa það dulítið dramatiskt og flott. Ég sé (heyri) fyrir mér eitthvað Wagnerískt, kraftmikið hádramatískt power-Symphotónverk með risakór sem orgar:
Fréttir!! Fréttir!! Broddi Brodda með Fréttir!!!!!!
Þá getur maður sett sig í stellingar og undirbúið sig . Fá á sig svolítinn vind áður en heimsfregnirnar bresta á með öllum sínum tragedíum..
Svo vil ég líka að Gesti Einari verði sagt upp úr morgunútvarpinu og meira af lögum með Cannibal Corpse, Deicide og Napalm Death verði spilað í reglubundinni dagskrá á Rás 2.
Annars finnst mér Rás 1 og 2 prýðisfínar radíostöðvar

bæææææ

07. febrúar 2007 klukkan 17:48
Jóhann Hermannsson
Almennt
8 athugasemdir

02febrúar

Hitt og þetta. Þó aðallega annað með viðkomu í ýmsu..

Fyrst af öllu ætla ég að leyfa ykkur að njóta þeirra forréttinda að komast að því hvað ykkar einlægur er að lesa núna..
Fyrst af öllu ber að nefna Ender´s Game e. Orson Scott Card. Bók sem að hjartans ljúfurinn bibbi var búinn að mæra í hástert og miðað við byrjunina er þetta bara mjög efnilegt. Hugo verðlaunin er líka alltaf ávísun á klassa.
Í annan stað nefni ég Sval og Val. Er að rifja upp nokkur þeirra helstu ævintýr og er þetta ennþá furðu-skemmtileg lesning og hressileg.
Í þriðja lagi er það Föruneiti Hringsins e. æruverðugan J.R.R. Tolkien. U.þ.b. áttunda skiptið sem ég byrja á þessari frábæru trílógíu og sé ég ekki ennþá eftir einni einustu mínútu sem ég hef eytt með Fróða, Gandalfi og félögum.
Loks ber að nefna teiknimyndasöguna 300 e. Frank Miller (Sin City). Þessi bók hefur verið rómuð allmikið og sögusviðið einkar spennandi, þ.e. Grikkland til forna. Hlakka til.

Er orðinn ansi heitur fyrir því að fá mér gæludýr. Þið ykkar sem að þekkið mig vel mynduð nú giska á að ég myndi fá mér eins og einn lítinn hvutta. En, Nei.. Ég er mikið að hugsa um að fá mér kött af Maine Coon kyni.

Eins og þið sjáið eru þetta einkar tignarlegar skepnur og geta vegið allt að 16 kílogrömmum! Sem að setur þá í flokk með Grænlandsstrútnum og Síberíudrekanum sem stærstu núlifandi spendýr heims. Í tilefni af þessu hef ég sett inn nýja könnun hér til hliðar.

Morgundagurinn lofar góðu. Ætla að bregða mér í kvikmyndahús með Jesúbarninu og sjá Rocky Balboa og býst ég ekki við því að koma ógrátandi út. Svo verður brunað inn á Hú og staðan tekin á þeim fáu eftirlegukindum sem að maður kennir enn þar. Hugsanlega stungið úr einum gulum..

Bless í bili..
P.S. áskil mér allan rétt til að hunsa niðurstöður skoðanakannanna og skýra köttinn því sem ég vil.. T.d. Fífukollur Blómálfssonsson

02. febrúar 2007 klukkan 03:41
Jóhann Hermannsson
12 athugasemdir

22janúar

Stuð & Fjör

Brá mér austur á firði um helgina og heimsótti gamlan vin. Ég á að sjálfsögðu bara einn gamlan vin á austfjörðum og því varð Röðull Reyr fyrir barðinu. Heppnaðist ferðin með eindæmum vel. Hápunktur ferðarinnar var að sjálfsögðu geysi vel heppnað þorrablót heimamanna. Stórfengleg skemmtun! Ég blés í herlúðra og söng með í fjöldasöngnum eins og óður væri. Er mál manna á Vopnafirði að kristaltær englarödd mín ómi enn í fjöllum. Þorrafæðið var allgott og vel útilátið. Bollan var hins vegar alger hryllingur en ég og Rölli létum það ekki á okkur fá og vorum orðnir vel hnjáliðamjúkir þegar að leið á kveldið. Stórhljómsveitin og verðandi júróvisjónfarar í von héldu uppi stuðinu á balli og spilaði þar með þeim einn vanmetnasti drag-garganleikari Íslandi, sjálfur Steisarinn.
Vopnfirðingar voru að vonum forvitnir um hvaða ljóshærði piltur sem syngur svo fallega væri kominn og spurðu mig allnokkrir hvurra manna ég væri. Ég svaraði keikur um hæl að ég væri mættur í umboði Röðuls. Var ég þá undantekningarlaust spurður til baka: Röðuls Reys?? Ég hélt nú að Röðulsnafnið væri ekki svo algengt á Vopnafirði að margir kæmu til greina.

En að öðru: Ég hef brotið odd af örlæti mínu, lagt gamla Sony cd-spilaranum mínum og fjárfest í glæbrönduðum EmmPjéÞrír spilara frá samsung. Þetta er svo sem ekki í frásögur færandi nema að hann er hrylliega innankuntubleikur og er mál manna að þetta sé eitt ljótasta hljómflutningstæki sögunnar. Ég er að sjálfsögðu afar ánægður með það

Best að ljúka þessu með tilvitnun í einn alskemmtilegasta karakter sjónvarpssögunnar, Heillakallinn Edmund Blackadder
"A man may fight for many things: his country, his principles, his friends, the glistening tear on the cheek of a golden child. But personally, I´d mud-wrestle my own mother for a ton of cash, an amusing clock and a stack of French porn"

22. janúar 2007 klukkan 19:51
Jóhann Hermannsson
Almennt
4 athugasemdir

09janúar

Spá fyrir 2007

Ég ætla að spá fyrir helstu atburði þessa árs núna. Býst við að þetta verði í svona 90% tilvika rétt enda er ég frábær.

Gabba Gabba Hey!!

Rockstar Mayhem fer af stað í byrjun sumars og mun Hreimur í Landi og sonum komast í úrslitaþættina. Framleiðslu verðu þó hætt snarlega þegar að þeim kumpánum Blasphemer og Necrobutcher sinnast við Dave Navarro, drepa hann og borða úr honum lifrina.
Bruce Dickinson og Steve Harris verða aðlaðir af Englandsdrottningu.
Íslendingar munu bjóða Færeyingum og Grænlendingum til varnarsamstarfs en báðar þjóðir neita. Í kjölfarið ráðast Íslendingar á Færeyjar og stríð hefst.
Repúblikanar munu sigra Forsetakosningar USA þrátt fyrir að fá aðeins 13% atkvæða.
Britney Spears mun deyja af of stórum skammti hrossadeyfilyfja og Elton John nýtir tækifærið og kemur hundleiðinlegu lagi sínu í þriðja sinn á topp vinsældalista út um allan heim.
Paris Hilton mun einnig deyja en enginn nennir að semja um það lag.
Íslenska karlalandsliðið í knattspyrnu mun notfæra sér glufu í lögum FIFA og kalla til Ásthildi Helgadóttur og Margréti Láru í liðið. Leikur liðsins batnar í kjölfarið til muna.
Völsungur kemst ekki upp um deild.
Tottenham Hotspur vinnur tvo bikara.
Kevin Federline mun gefa út plötu þar sem hann túlkar bestu lög Ray Charles og verður hengdur opinberlega í kjölfarið.
Angelina Jolie og Brad Pitt ættleiða fullorðinn karlmann frá Grænlandi.
Framsóknarflokkurinn líður undir lok.
Fyrsta Órangútanaeldisstöðin á Íslandi mun hefja störf í Hallormstaðaskógi.
Kr-ingar falla.
Í ljós kemur að Oprah Winfrey er í rauninni karlmaður.
Og eitthvað fleira.. Mark my words!!

09. janúar 2007 klukkan 03:00
Jóhann Hermannsson
Almennt
4 athugasemdir

31desember

Árið í máli en engum helv.. myndum.

Nú fer 2006 alveg að hætta og farið hefur fé betra segi ég nú bara. Svona almennt var þetta bara allþokkalegt ár. Fé skilaði sér vel af fjalli og nyt voru góð. Eins og venjan er á þessum tímapunkti hafa hinir og þessir sérfræðingar út um allar trissur ákveðið að draga höfuðið út úr rassgatinu á sér til að smíða annála og árslista ýmis konar. Og að sjálfsögðu mun yðar einlægur stökkva til og smella sér í þennan hóp besservissera og rifja upp hitt og þetta!

Hey ho Let´s go!!

Plata ársins er auðvitað Blood Mountain með Mastodon. Er hún vel að því komin enda ekki lítið mál að toppa útgáfur Tool, Iron Maiden og Slayer.

Tónleikar ársins voru Tool á roskilde. Hryllilega gaman og á hæla þeirra kemur Roger Waters á sömu hátið.

Vonbrigði ársins eru Motörhead tónleikarnir í laugardalshöll í sumar. Hvaða tónleikar spyrjið þið kannski?? Einmitt.. Það voru engir helvítis tónleikar.

Partý Ársins eru tvö enda ómögulegt að gera upp á milli þeirra. Annars vegar geypihresst júróvisjónparty Edda Knífs þar sem veggir skulfu og bjórinn flæddi eins og vín og hins vegar GardenParty Yngva "Gastró" Leifs. Er mál manna að aldrei hafi nokkurn tímann verið eins góðmennt á nokkrum stað.

Ljósmyndari ársins hlýtur að vera Hilli litli punglausi sem að fór hamförum á þessu sviði og nægir að benda á myndina sem hann tók af Sigga Brill.

Akstursíþróttamaður ársins er Eyþór Arnalds. 'Nuff said.

Húsmóðir ársins er Jakobína Gumsmóðir sem að hýsti hinar ýmsustu örlagafyllibyttur og vandala með bros á vör og heitt á könnunni.

Heimasíða ársins er Pandora.

Roadtrip ársins er ferð okkar góða fólksins á tónleika með Ljótu hálfvitunum í Reykholt, Biskupstungum.

Kvikmynd ársins er Casino Royale. Daniel Craig lengi lifi!

Viðbjóðsleg leiðindi ársins er útvarpsbloggið hennar Margrétar Eir sem ég heyrði um daginn.. Það blæddi úr eyrunum á mér og ég fékk hryggskekkju og hina ýmsustu kynsjúkdóma úr leiðindum.

Skemmtileg tilviljun ársins er þegar að ég og Aggi hittum Kalla Kufffélagsins sérdeilis óvænt í köben.

Fyndinn ársins er Halli kærastinn hennar Guðrúnar út á Roskilde. ..Óborganlegur.

Svalasti gamli kall ársins er Roger Waters.

Illmenni ársins er hver sá sem að barði mig í reykjavík.

Miskunnsami Samverji ársins eru þær stöllur Dísa og Eygló sem sáu aumur á mér þar sem ég lá í blóði mínu og skutluðu mér upp á slysó.

Heimska ársins er ég fyrir að þiggja ekki boð Togga Tryggva um að skutla mér heim andartökum áður en téðar barsmíðar hófust.

Nóg komið. Hafið það sem allra best á ´07 og elskist sem mest þið megið.

Jóhann Hermannsson

31. desember 2006 klukkan 21:14
Jóhann Hermannsson
Almennt
7 athugasemdir

20desember

Djöfull var Phil Lynott svalur!!

Sit og hlusta dolfallinn á "Live & Dangerous" með Thin Lizzy. Og ég get svo svarið það að ég ætla að gera allt sem í mínu valdi stendur til að lífga Phil gamla bassahund við og fá þá til að spila á Roskilde '07.
Annars er lítið að frétta.. Var í klippingu og er bara býsna sáttur við afraksturinn (eh, "afraksturinn", Nudge, nudge. If ya catch my drift!)
Ætla að reyna að kíkja á Hú á fös. Setur að vísu strik í reikninginn að það er spáð ragnarökum og dauða á Þolllák þannig að óvíst væri að maður kæmist til baka. Og fyrst það er búið að brenna Bakkann get ég ekki hætt á það. Maður verður jú að borða rjúpurnar einhverns staðar. Það var flóð á Ak áðan og því miður var búið að loka götunni þegar ég kom aðvífandi með brimbrettið undir einari hendi tilbúinn í salibunureið dauðans.. Ekkert smá hressandi og smá sörf svona rétt fyrir vetrarsólstöðuhátíðir.
Mæli með því að þið tjékkið á laginu Massacre með Thin Lizzy. Hressandi classic rock með flottum texta og djúpri dansandi hrynjandi.

Guð, Guð, jólastuð! Kveð að sinni..

20. desember 2006 klukkan 04:22
Jóhann Hermannsson
Almennt
6 athugasemdir

15desember

Nei, Jói! Skamm! Skamm!!

Ég er svo mikið fífl.. Fór sturtu áðan sem er svo sem ekki í frásögur færandi nema að ég ákvað að raka mig. Og í óðagoti og hálfvitaskap ákvað ég að raka af mér allt skeggið. Núna lít ég út fyrir að vera 11. ára og er eins og sauður! Djöfulsins heimska alltaf í manni.. Er að hugsa um að berja sjálfan mig í öxlina og jafnvel taka mig í nasabað.
annars er ekkert að frétta..
Taðskegglingurinn kveður

15. desember 2006 klukkan 00:42
Jóhann Hermannsson
Almennt
4 athugasemdir

Síða 9 af 15

SATANBEST

To Hell and back..

Júhú!!

...

Tuðstuð

Hitt og þetta. Þó aðallega annað með viðkomu í ýmsu..

Stuð & Fjör

Spá fyrir 2007

Árið í máli en engum helv.. myndum.

Djöfull var Phil Lynott svalur!!

Nei, Jói! Skamm! Skamm!!

Aðalvalmynd

Klukkan

Auglýsing

Gagnasafn

Tilvitnunin

Þessa stundina

Könnun

MSN

Teljari

Bloggpakk

eitthvað dót

Tónlistin

Leit